வெடித்து சிதறும் நிலையில் ராட்சத நட்சத்திரம்

அண்டவெளியில், இதுவரை மனித ஆய்வுக்கு புலப்படாத எண்ணற்ற நட்சத்திரங்கள் உள்ளன. இவற்றில் பல, சூரியனைக் காட்டிலும் பல நூறு மடங்கு பெரியவை. எரிந்து கொண்டிருக்கும் இந்த நட்சத்திரங்களில் இருந்து ஏராளமான வெப்பம், ஒளி, சக்தி வெளியாகிக் கொண்டிருக்கின்றன. பல கோடி ஆண்டுகளாக உள்ள இந்த நட்சத்திரங்கள், ஒரு கட்டத்தில் தங்கள் சக்தியை இழந்து, வெடித்துச் சிதறுகின்றன.

இதுபோன்ற, இறக்கும் நிலையில் உள்ள நட்சத்திரம் ஒன்று, சமீபத்தில் கண்டுபிடிக்கப்பட்டுள்ளது. கடந்த மே மாதத்தில், "ஹெர்செல்ஸ்' என்ற விண்வெளி தொலைநோக்கி ஒன்றை, லண்டனில் உள்ள ராயல் விண்வெளி ஆய்வுமையம் விண்ணில் செலுத்தியது.அண்டவெளியில் உள்ள நட்சத்திரங்கள் குறித்து, நிறமாலை ஆய்வுக் கருவி (ஸ்பெக்ட்ரோஸ்கோபிக்) உதவியுடன், இந்த விண்வெளி தொலைநோக்கி ஆய்வு செய்தது. அதில், இறக்கும் நிலையில் உள்ள நட்சத்திரம் ஒன்று கண்டுபிடிக்கப்பட்டுள்ளது."வி.ஒய்.,கேனிஸ் மேஜோரிஸ்' என்ற பெயர் கொண்ட அந்த நட்சத்திரம் வித்தியாசமானதாகவும், சூரியனை விட 30 முதல் 40 மடங்கு பெரியதாகவும் உள்ளது. பூமியில் இருந்து, நான்கு ஆயிரத்து 500 ஒளி ஆண்டுகள் தொலைவில் இந்த நட்சத்திரம் எரிந்து கொண்டிருக்கிறது."வி.ஒய்.,கேனிஸ் மேஜோரிஸ்' நட்சத்திரத்தில் இருந்து அணுக்களும், மூலக்கூறுகளும் சுழற்றி, வெளியே வீசி எறியப்படுவது தொலைநோக்கி மூலம் கண்டறியப்பட்டுள்ளது. அந்த நட்சத்திரம், இயல்பு அளவை விட அதிகமாக ஒளி வீசும் "சூப்பர்நோவா' நிலையை அடைந்துள்ளது.

எனவே, எந்த நேரத்திலும் அந்த நட்சத்திரம் வெடிக்கும் என எதிர்பார்க்கப்படுகிறது. நட்சத்திர கூட்டத்தில், கடந்த 200 ஆண்டுகளாக"வி.ஒய்.,கேனிஸ் மேஜோரிஸ்' நட்சத்திரம் உள்ளதை, விண்வெளி ஆய்வாளர்கள் பதிவு செய்துள்ளனர். இறக்கும் நிலையில் உள்ள இந்த நட்சத்திரம், தற்போது உட்கருவில் உள்ள எரிபொருளை மிக வேகமாக எரித்து வருகிறது. இதனால் இது சிவப்பு நிறத்தில் மிகப் பெரிய ஒரு ராட்சஷன் போல் காணப்படுகிறது."ஹெர்செல்ஸ்' தொலைநோக்கியில் நிறமாலை கருவியுடன் இணைக்கப்பட்டுள்ள "பேக்ஸ் அண்டு ஸ்பியர்' என்ற கருவி உதவியுடன் ஆய்வு செய்ததில் "வி.ஒய்.,கேனிஸ் மேஜோரிஸ்' நட்சத்திரத்தைச் சுற்றி கடல் அலை போல் மேகக்கூட்டம் திரண்டு காணப்படுகிறது.

மேலும், நட்சத்திரத்தின் வெடிப்பில் இருந்து வெளிப்படும் ஒளியின் அலை நீளத்தை நிறமாலை கருவி கொண்டு, இறந்து வரும் நட்சத்திரத்தில் ஒளி தோன்றுவதற்கான ரசாயனம் என்ன என்பது குறித்து ஆய்வு நடத்தப்பட்டு வருகிறது. "வி.ஒய்.,கேனிஸ் மேஜோரிஸ்' நட்சத்திரத்திற்கு அருகில் ஏராளமான கார்பன் மோனாக்சைடு மற்றும் நீர் உள்ளது.இங்கிலாந்தில் உள்ள கார்டிப் பல்கலைக்கழகத்தின் பேராசிரியர் மேட் கிரிப்பின், பால்வெளி மண்டலம் சுருள் வடிவில் காணப்படுவதற்கான கொள்கைகள் குறித்து பல விஷயங்களை கண்டுபிடித்துள்ளார். இதுகுறித்து அவர் கூறுகையில்,"இங்குள்ள கார்பன்மோனாக்சைடு வாயு அடுக்குகளின் வெப்பநிலையுடன், வி.ஒய்.,கேனிஸ் மேஜோரிஸ்' நட்சத்திரத்திற்கு அருகில் உள்ள கார்பன் மோனாக்சைடு வாயு அடுக்குகளின் வெப்பநிலை, அடர்த்தி, இங்கிருந்து உள்ள தொலைவு உள்ளிட்டவைகள் ஒப்பிடப்பட்டுள்ளன.

இந்த ஆய்விலிருந்து, அங்குள்ள வாயு அடுக்குகளில் நீர் அதிகமாக இருக்கிறது. இது, அங்குள்ள வாயுக்களில் இயற்பியல் மற்றும் ரசாயன மாற்றங்கள் அதிகளவில் நடந்து வருவதை காட்டுகிறது.மேலும், மேகம் போன்று காணப்படும் வாயு மற்றும் தூசிக் கூட்டத்தின் ஒரு முனையில் தான், இந்த வி.ஒய்.,கேனிஸ் மேஜோரிஸ்' நட்சத்திரம் அமைந்திருப்பது தெரிய வந்துள்ளது' என்றார்.வி.ஒய்.,கேனிஸ் மேஜோரிஸ்' நட்சத்திரம் அதன் எடையை இழந்து வருவதுடன் அதன் மேல் பகுதி விரிவடைந்து வருகிறது. இதனால் இந்த நட்சத்திரம் இறக்கும் நிலையில் உள்ளது என்பது, இந்த ஆய்வு மூலம் தெரிய வருகிறது.பிரம்மாண்ட நட்சத்திரம் வெடித்துச் சிதறுவதால், விண்வெளியில் பாதிப்பு ஏற்படுமா என்ற கேள்விக்கு, இதுபோன்று ஏராளமான நட்சத்திரங்கள் வெடித்துச் சிதறியிருக்கின்றன. அதுபோன்ற நேரங்களில் எந்த பாதிப்பும் இல்லை. எனவே, இப்போதும் இருக்காது என்று ஆய்வாளர்கள் கருத்து தெரிவித்துள்ளனர்.

சுதந்திரக்காற்று சுவாசிக்க .., இலங்கை அரசு விடுவித்தது; முகாம் தமிழர்கள் மகிழ்ச்சி !

6 மாதத்திற்கும் மேலாக முகாம்களில் அடைக்கப்பட்ட தமிழர்கள் சுதந்திர காற்று சுவாசிக்க அனுமதிக்கப்பட்டுள்ளனர் . இலங்கை அரசு உத்தரவை அடுத்து இலங்கை தமிழ் மக்கள் , மகிழ்ச்சியுடனும் , உற்சாகத்துடனும், இருப்பதை காண முடிகிறது.

இலங்கையில் புலிகளுக்கும் - அரசுக்கும் 25 ஆண்டு காலமாக கடும் போர் நடந்தது . போரில் புலிகள், ராணுவத்தினர், பொதுமக்கள் உள்பட லட்சக்கணக்கானோர் கொல்லப்பட்டனர். கடந்த மே மாதம் போர் உச்சக்கட்டத்தை அடைந்தது. இத்துடன் பிரபாகரன் இறப்புக்கு பின் முடிவுக்கு வந்தது. இதனையடுத்து போர்க்காலங்களில் பிடிக்கப்பட்ட மற்றும் சந்தேகத்திற்கு இடமான தமிழ் மக்களை பிடித்து அகதிகள் முகாம் என்ற பெயரில் அடைத்து வைத்தது. இலங்கையில் போர்க்குற்றம் நடந்திருப்பதாக அமெரிக்கா அறிக்கை கேட்டது. போர் முடிவு ஏற்பட்டாலும் முகாம்களில் தமிழர்கள் இடம் பெயரக்கூடாது என கடும் பாதுகாப்பு பிடியில் இருந்தனர். முள் வேலிக்குள் சிக்கி தவித்த காட்சிகள் குறித்து தமிழக மக்கள் கடும் கண்டனம் தெரிவித்தனர்.

சர்வதேச கண்டனம்: இந்நிலையில் இலங்கை முகாம்களில் வாழும் தமிழர்களை சந்திக்க மத்திய அரசு அனுமதியுடன் தமிழக எம்.பி.,க்கள் குழுவினர் இலங்கை புறப்பட்டு சென்றனர். அங்கு தமிழர்களை சந்தித்து குறைகள் குறித்து கேட்டறிந்தனர். முகாம் தமிழர்கள் விரைவில் விடுவிக்கப்பட வேண்டும் என எம்.பி.,க்கள் குழு அதிபர் ராஜபக்‌சேவிடம் வலியுறுத்தியது. சர்வதேச அளவிலும் முகாம்களில் அகதிகள் அடைக்கப்பட்டிருப்பதற்கு கண்டனம் எழுந்தது. இது குறித்து விரைந்து நடவடிக்கை எடுக்கப்படும் என உறுதி அதிபர் ராஜபக்சே அளித்தார். கடந்த அக்டோபர் மாதம் 40 ஆயிரம் பேர் மீள்குடியேற்றம் செய்ய நடவடிக்கை எடுக்கப்பட்டதாக இலங்கை அரசு அறிவித்தது.

இன்று ( 1 ம் தேதி ) வவுனியாவில் உள்ள முகாம் தமிழர்கள் சுதந்திரமாக சென்று வர விடுவிக்கப்படுவதாக அரசு அறிவித்தது. இந்த செய்தி கேட்ட தமிழ்மக்கள் பெரும் மகிழ்வுடன் காணப்பட்டனர். இங்குள்ள ஒரு லட்சத்து 30 ஆயிரம் பேர்களும் இன்னும் ஒரிரு நாளில் சுதந்திரமாக சென்று வர அனுமதிக்கப்படுவர். இதன்படி தமிழ்மக்கள் அருகில் உள்ள முகாம்களுக்கு சென்று வரலாம், அங்கேயே தங்கி கொள்ளலாம். இவர்கள் முறைப்படி பதிவு செய்யப்பட்டு அனுப்பி வைக்கப்பட்டுள்ளனர்.

15 நாட்களுக்குள் முகாமுக்கு திரும்ப வேண்டும் : வெளியே எங்கு சென்றாலும் 15 நாட்களுக்குள் முகாமுக்கு திரும்பி விட வேண்டும். இவர்களை பாதுகாப்பு படையினர் கண்காணிப்பர். செவ்வாய்கிழமையில் ( இன்று ) சுமார் 6 ஆயிரம் பேர் வெளியே சென்றுள்ளனர். இவர்கள் நிரந்தரமாக வீடுகளுக்கு செல்ல விரைவில் அனுமதிக்கப்படுவார்கள் என ராணுவ செய்தி தொடர்பாளர் பிரிக் உதயநானயகாரா தெரிவித்தார். முகாம்களில் இருந்து வெளியே சென்று வர போக்குவரத்து ஒரு பிரச்னையாக உள்ளது. இருந்தாலும் கை, கால் வீசியபடி உற்சாகமாக சென்ற வண்ணம் இருந்தனர் தமிழர்கள்.

உலகப் பொருளாதாரம் எங்கு செல்கிறது?

திரும்பிப் பார்ப்பதற்குள் ஒரு வருடம் முடிந்து விட்டது. உலகை உலுக்கிய பொருளாதார பிரச்னை, உலக நாடுகள் அனைத்திற்கும் பரவ ஆரம்பித்தது. எரிந்த தீ அணைந்து விட்டதா? இன்னும் எரிந்து கொண்டிருக்கிறதா? விடை தெரியத்தான் இந்தக் கட்டுரை.

சரியாக செப்., 2008ல் தான் அமெரிக்காவின் மிகப்பெரிய முதலீட்டு வங்கியான "லேமென் பிரதர்ஸ்' மூழ்கி விட்டது என்ற செய்தி வந்தது. அதைத் தொடர்ந்து உலகின் பல பகுதிகளிலும் இருந்து வந்த செய்திகளும் உலகையே திருப்பிப் போட்டு சென்றது.யானை புகுந்த கரும்புத் தோட்டம் போல் ஆனது உலகம். பங்குச் சந்தைகள் இருந்ததில் பாதியை இழந்தன. வங்கிகள் பல மூழ்கின. அரசாங்கங்கள், என்ன செய்வது என்று தெரியாமல் முழித்தன.அடிபட்டவர்கள் பல லட்சக்கணக்கானோர். எழுந்தவர்கள் சில லட்சம் பேர் தான். ஆனால், கற்றுக் கொண்ட பாடங்கள் ஏராளம். ஏனெனில் பலர் இது போன்ற நிகழ்வுகளை வாழ்க்கையில் சந்திக்காதது.அதிகம் பாதிக்கப்படாத நாடுகள் மிகவும் குறைவாக இருந்தன. அதில் இந்தியாவும் ஒன்று என்பதில் நமக்கு மிகவும் பெருமை.

விழுந்த காரணம் என்ன? அளவுக்கு அதிகமான சம்பளம், போனஸ் (அதாவது கோடிக்கணக்கில்) என்று கொடுத்து எடுக்கப்பட்ட எம்.பி.ஏ., இளைஞர்களுக்கு கொடுக்கப்பட்ட கட்டளைகள், என்ன செய்தாவது கம்பெனியின் வருமானத்தை உயர்த்துங்கள் என்று. ஆதலால் பலருக்கு ஏதாவது செய்தாவது லாபத்தை கூட்ட வேண்டும் என்ற எண்ணங்கள், செயல்பாடுகள்.அதில் ஒன்று தான் நிதி ஆதாரம் அதிகம் இல்லாதவர்களுக்குக் கூட அதிகப்படியான வீட்டுக் கடன்களை வாரி வழங்கியது. வட்டி மிகவும் குறைந்திருந்த போது வாங்கிய அளவுக்கு அதிகமான கடன்கள் பின்னர் வட்டி கூடிய போது வட்டி கூட கட்ட முடியாத ஒரு சூழ்நிலை.வீடுகளின் விலை வேறு குறைய ஆரம்பித்தது. உலகளவில் இந்தக் கம்பெனிகள் முதலீடு செய்திருந்த முதலீடுகளும் பங்குச் சந்தையின் பாதிப்பால் மதிப்பு குறைய ஆரம்பித்தன. நஷ்டங்கள் லட்சக்கணக்கான கோடிகளில்.கடன்கள் திரும்பி வராமல் போனதால் வங்கிகளுக்கும், வீட்டுக் கடன் நிறுவனங்களுக்கும் மிகப்பெரிய நஷ்டம். ஆதலால், கொடுத்த கடன்கள் திரும்ப வராததால் பல வீட்டுக் கடன் நிறுவனங்களும், நூற்றுக்கணக்கான வங்கிகளும் திவாலாகி வந்தன.

எப்படி திரும்ப எழுந்தது?திரும்ப எழ காரணம், அரசாங்கங்களின் ஒத்துழைப்பு தான். பல நிறுவனங்களுக்கும், வங்கிகளுக்கும் பல லட்சம் கோடிகள் பண உதவி செய்து அந்த கஷ்டமான சூழ்நிலையிலிருந்து மீள வழிவகை செய்தது. எல்லோருடைய ஒருங்கிணைந்த முயற்சி தான், விரைவில் மீண்டெழுந்ததற்கான காரணம். அதனால், பல நிறுவனங்கள் தப்பின.இருந்தாலும், நூற்றுக்கணக்கான நிறுவனங்கள் காணாமல் போயின. இதில் நூறாண்டுகள் கழிந்த நிறுவனங்களும் அடங்கும்.இது தவிர மக்களும் தங்களது வாயைக் கட்டி, வயிற்றை கட்டி இருந்ததும் ஒரு காரணம். அதாவது, அந்த கஷ்டமான சூழ்நிலையில் பெரிய செலவு ஏதும் செய்யாமல் இருந்தனர். கம்பெனிகளும் தங்கள் செலவுகளை கட்டுப்படுத்தின. ஆதலால், அவர்களின் லாபம் கூடியது. விற்பனைகள் குறைந்த போதும் லாபம் கூடியது.

திரும்பி வந்த பங்குச் சந்தை நஷ்டங்கள்:பங்குச் சந்தையில் ஏற்பட்ட நஷ்டங்களை பலர் ஒரு வருடத்தில் திரும்பப் பெற முடிந்தது மிகவும் ஒரு ஆச்சரியமான விஷயம் தான். இதற்கு முந்தைய பொருளாதார நெருக்கடிகளில், அதாவது, 1987ம் ஆண்டு முதலீட்டாளர்கள், தாங்கள் இழந்தவற்றை திரும்பப்பெற இரண்டு வருடங்கள் காத்திருக்க வேண்டியிருந்தது. 1973ம் ஆண்டு ஏற்பட்ட நெருக்கடியில் முதலீட்டாளர்கள் மூன்று வருடங்கள் காத்திருக்க வேண்டியிருந்தது.ஆனால், 1929ம் ஆண்டு ஏற்பட்ட "கிரேட் டிப்ரஷன்' (பண வாட்டம்) இழந்தவற்றை திரும்பப் பெற 25 ஆண்டுகள் காத்திருக்க வேண்டியிருந்தது. அப்படி பார்க்கும் போது இந்த முறை உலக நாடுகள் மீண்டெழுந்தது ஒரு வருடத்திற்குள். ஆதலால், இந்த மீண்டெழுச்சியை பீனிக்ஸ் பறவை சாம்பலிலிருந்து உயிர்த்தெழுந்ததற்கு இணையாக ஒப்பிடுகின்றனர்.

இந்தியா ஏன் அதிகம் பாதிக்கப்படவில்லை?கடந்த ஆண்டு பொருளாதார சீர்குலைவோ அல்லது அதற்கு முன் ஏற்பட்ட ஆசிய பொருளாதார வீழ்ச்சியோ இந்தியாவை அதிகம் பாதிக்கவில்லை. காரணம், திறமையான நிர்வாகம். மேலும், உலகத்தின் பல பாகங்களிலும் நடைமுறைப்படுத்தப்பட்டுள்ளதைப் போல, பொருளாதார சீர்திருத்தங்களை பெரிய அளவில் இங்கு கொண்டு வராதது தான்.

உலகமெங்கும் வங்கிகளின் நிலைமை:உலகமெங்கும் வங்கிகள் இன்னும் மூழ்கிக் கொண்டிருக்கின்றன. அமெரிக்காவில் மட்டும் கடந்த ஆண்டு 25 வங்கிகளும், இந்த ஆண்டு 75 வங்கிகளுக்கும் மேல் மூழ்கி விட்டன. இந்திய வங்கிகள் நல்ல நிலையிலேயே இருக்கின்றன.இந்தியாவில் வங்கிகள் சமீபகாலத்தில் மூழ்கியதாக சரித்திரமே இல்லை. அப்படி மூழ்கும் நிலை வந்தாலும் அந்த வங்கியை நல்ல நிலையில் இருக்கும் வங்கியோடு இணைத்து, முதலீட்டாளர்களின் பணத்திற்கு உத்தரவாதம் அளிக்கப்பட்டு வந்திருக்கிறது. உதாரணம் நியூ பாங்க் ஆப் இந்தியா வங்கி, பஞ்சாப் நேஷனல் வங்கியுடன் இணைக்கப் பட்டது. தனியார் வங்கியான குளோபல் டிரஸ்ட் வங்கி, ஓரியண்டல் பாங்க் ஆப் காமர்சுடன் இணைக்கப்பட்டது. மகாராஷ்டிராவின் சாங்கில் வங்கி, ஐ.சி.ஐ.சி.ஐ., வங்கியுடன் இணைக்கப்பட்டது.இந்திய வங்கிகளில், தனி நபர் ஒருவருக்கு, ஒரு வங்கியில் ஒரு லட்சம் ரூபாய் வரை தான் பணத்திற்கு காப்பீடு இருக்கிறது. ஏனெனில், வங்கிகளுக்கு ஏதாவது ஆகும் பட்சத்தில் அங்கு நீங்கள் ஒரு லட்சம் ரூபாய்க்கு மேல் போட்டிருந்தால் அந்த வங்கியை வேறு வங்கியுடன் இணைக்காத பட்சத்தில் ஒரு லட்சம் ரூபாய் வரை தான் திருப்ப கிடைக்கும். ஆனால், அது போல சந்தர்ப்பங்கள் சமீப காலங்களில் ஏற்படவேயில்லை என்பதால் பயம் ஏதும் தேவையில்லை.

இந்த நிகழ்வுகளில் கற்றுக் கொண்டது என்ன?சேமிப்பின் அவசியத்தைக் கற்றுக் கொண்டோம். சேமிக்காதவர்களுக்கு இது ஒரு பாடமாக இருந்தது. எல்லா சேமிப்பையும் ஒரே முதலீட்டில் போடக் கூடாது என்பதையும் கற்றுக் கொண்டோம்.ஆண்டாண்டு காலமாக தங்கம், வெள்ளியில் சேமித்து வந்திருக்கிறோம், அது எவ்வளவு உன்னதமானது என்று உலகத்திற்கு நாம் எடுத்துக் காட்டினோம். உலகமும் நம்மை பின்பற்றத் தொடங்கியது. ஆதலால், தங்கம், வெள்ளி தொடமுடியாத அளவிற்கு சென்று விட்டது.

துபாயில் என்ன நடந்தது?துபாய் அரசுக்கு சொந்தமான "துபாய் வேர்ல்ட்' என்ற நிறுவனம் தனது கட்டுமானப் பணிகளுக்காக பல நிறுவனங்களிடமிருந்து கடன்கள், வேலைகளை வாங்கியிருந்தது. அதில் 80 பில்லியன் டாலர் (3,70,000 கோடி) அளவு கடன்களை செலுத்த முடியாததால் அதை செலுத்துவதற்கு இன்னும் ஆறு மாத தவணை வேண்டும் என்ற கேட்டது உலகையை உலுக்கியது.ஏனெனில், உலகின் மிகவும் பணக்கார நாடுகளில் ஒன்றாக கருதப்பட்டது அரபு நாடுகள் தான். உலகின் பெரிய நாடுகளே தங்களுக்கு பிரச்னை ஏற்படும் போது அரபு நாடுகளை நாடுவது வழக்கம் (சிட்டி வங்கி தனக்கு பிரச்னை ஏற்பட்ட போது அரபு நாடுகளைத் தான் நாடியது).  அவர்களுக்கே பிரச்னை என்றால் எங்கு செல்வார்கள்? அரசு வாங்கிய கடனை திருப்பி செலுத்த முடியாமல் போனது உலகை ஒரு உலுக்கு உலுக்கியது. அதாவது தனி நபரோ அல்லது கம்பெனியோ கடன் வாங்கி கொடுக்க முடியாமல் போயிருந்தால் அது வேறு விஷயம். ஆனால், கடன் வாங்கியதோ துபாய் அரசு. அவர்களே கொடுக்க முடியாமல் போனால்?

துபாய் திரும்ப எழுமா?துபாய், உலகத்தின் வர்த்தக மையமாகவும் திகழ்கிறது. ஆதலால், துபாயின் பிரச்னையின் அளவு 80 பில்லியன் டாலர் என்றால், அதை தீர்ப்பது அவர்களுக்கு அவ்வளவு கடினமான காரியம் இல்லை. ஆனால், பிரச்னை இதை விட பெரிது என்றால், அது இந்தியாவை சிறிது பாதிக்கும் என்பதில் ஐயமில்லை.ஏனெனில், தற்போதே அங்கு கட்டட விலை மிகவும் குறைந்து விட்டது. இது தவிர வங்கிகள் இனி வீடுகள் வாங்கக் கடன் கொடுக்குமா என்பது யோசிக்க வேண்டும். ஆதலால், கட்டுமானப் பணிகள் குறையும் பட்சத்தில் அங்கு வேலை செய்யும் பல ஆயிரக்கணக்கான மக்கள் வேலை இழக்கும் அபாயம் உள்ளது.துபாயும் மற்ற நாடுகளைப் போல செலவுகளை குறைக்க முயற்சிக்கும். தற்போது துபாய் போன்ற நாடுகளில் அமெரிக்க, ஐரோப்பிய நாடுகளைச் சேர்ந்தவர்களை தலைமைப் பதவிக்கு அமர்த்தி அழகு பார்ப்பதும் அவர்களுக்கு அளவுக்கு அதிகமாக சம்பளம் கொடுப்பதும் வாடிக்கை தான். இனிமேல் அது போன்ற பதவிகள் இந்தியர்களுக்கு கிடைக்கும் வாய்ப்புகள் உள்ளன.

நன்றி :

சேதுராமன் சாத்தப்பன்

அப்பாவை தேடினால் ‘அம்மா’ கிடைத்தார்

லண்டன்: என் அப்பா யாரும்மா? என்று கேட்டு நச்சரித்த மகளிடம் அடையாளம் சொல்லி அனுப்பினார் அம்மா. தேடியலைந்த மகள் கண்டுபிடித்ததோ அப்பாவை அல்ல, இன்னொரு அம்மாவை! இந்த ருசிகர தேடல் இங்கிலாந்து தலைநகர் லண்டனில் அரங்கேறியது. 22 வயது பெண் எமிலி வாலிஸ். இவர் தந்தையை பார்த்ததே இல்லை, தாயின் அரவணைப்பில் வளர்ந்தவர். ஆனால், அடிக்கடி அப்பா யாரும்மா? என்று தாயிடம் கேட்டு வந்தார். நீ வளர்ந்ததும் சொல்றேன், பொறுமையா இரு என்று சொல்லி வந்தார் அம்மா. ஓராண்டுக்கு முன், உன் அப்பா பேரு கிளைவ் ஹாரிங்சன் என்று கூறி அடையாளங்களைச் சொல்லி மகளை தேடி வரச் சொன்னார் அம்மா.

விடா முயற்சியுடன் கிளைவ் ஹாரிங்சனை தேடிய எமிலி, கடைசியில் கடந்த சில நாட்கள் முன்பு அவரைக் கண்டுபிடித்து விட்டார் . ஆனால், அப்பாவாக அல்ல, அம்மாவாக! ஆம். கிளைவ் ஹாரிங்சன், சலோ என்று பெயரை மாற்றிக் கொண்டு பெண்ணாக மாறியிருந்தார். லிப்ஸ்டிக் பூசிய உதடுகள், வீட்டில் 82 ஜோடி லேடீஸ் செருப்புகள் என சகதோழியாக அப்பாவை பார்த்து முதலில் அதிர்ந்தார் எமிலி. பிறகு, சகஜ நிலைக்கு திரும்பினார். இப்போது எப்படியோ, இனி அப்பன் பேர் தெரியாதவள் என யாரும் சொல்ல முடியாது. ஒரிஜினல் அப்பாவை கண்டுபிடித்தாகி விட்டது என மகிழ்கிறார் எமிலி.

அவர் கூறியதாவது: லிப்ஸ்டிக், வெள்ளி நிற சல்வார், மேக்கப், நீண்ட விக் என அப்பாவைப் பார்த்ததும் என்ன சொல்வது என புரியாமல் தவித்தேன். பிறகு, என்னை விட நீங்கள் அழகாக இருக்கிறீர்கள் அப்பா(!) என்றேன்.எனது அப்பாவைக் கண்டுபிடித்து அம்மாவுடன் ஒன்று சேர்க்க வேண்டும் என்று கனவு கண்டு வந்தேன்.  அவரைக் கண்ட பிறகு இனி, அதற்கு வாய்ப்பில்லை என்பதை உணர்ந்தேன். எனினும், அவருடன் தோளோடு தோள் நின்று வாழ்க்கையை தொடர முடிவு செய்துள்ளேன்.முழு பெண்ணாக மாற அவர் அறுவை சிகிச்சை செய்து கொள்ளும்போது மருத்துவமனையில் உடனிருந்து கவனித்துக் கொள்வேன். எனது திருமணத்தின்போது மணப்பெண் தோழியாக ÔசலோÕ எப்போதும் இருக்க வேண்டும். அப்படி நடந்தால் பெருமைப்படுவேன் என்றார். அம்மா ஏன் இந்த புது அம்மாவை விட்டுப் பிரிந்திருப்பார் என்பதை மகள் உணர்ந்திருப்பார் என்று நம்புவோம்.

வரலாற்று சம்பவம்: 03.12.1984. போபாலில் விஷ வாயு தாக்கி 2,500 பேர் பலி

நெஞ்சை உறைய வைக்கும் ஒரு பயங்கர சம்பவம் 3/12/1984 அன்று மத்திய பிரதேச மாநிலம் போபால் நகரில் நடந்தது. விஷ வாயு தாக்கி 2,500 பேர் இறந்தார்கள்.

ஆயிரக்கணக்கானவர்கள் கண் பார்வை இழந்தார்கள். போபால் நகரில் பூச்சி மருந்து தயாரிக்கும் "யூனியன் கார்பைடு" என்ற தொழிற்சாலை இருந்தது. இந்த தொழிற்சாலையில் பூமிக்கு அடியில் "மெதில் ஐசோ சயனைடு" என்ற வாயு சேமித்து வைக்கப்பட்டு இருந்தது. இது சக்தி வாய்ந்த விஷ வாயுவாகும். பூச்சி மருந்து தயாரிக்க பயன்படுவதாகும்.

 

3/12/1984 நள்ளிரவு 1 மணி அளவில் விஷ வாயு சேமிப்பு தொட்டியை மூடியுள்ள வால்வு, தொட்டிக்குள் ஏற்பட்ட அழுத்தம் காரணமாக உடைந்தது. இதனால், விஷ வாயு கொஞ்சம் கொஞ்சமாக கசிந்து வெளியேறியது. சிறிது நேரத்திலேயே அங்கிருந்த அதிகாரிகள் இதனை கண்டுபிடித்தார்கள். 40 நிமிட நேரத்தில் கசிவு நிறுத்தப்பட்டது. என்றாலும், அதுவரை கொஞ்சம் கொஞ்சமாக தொழிற்சாலையில் இருந்து வெளியேறிய விஷ வாயு நகரத்திற்குள்ளும், 40 சதுர கிலோ மீட்டர் சுற்று வட்டாரத்திற்குள்ளும் பரவியது.

 

அந்த பகுதியில் வசித்தவர்களை விஷ வாயு தாக்கியது. இதனால் ஆண்களும், பெண்களும், குழந்தைகளும் மயக்கம் போட்டு விழுந்தார்கள். அவர்களுக்கு மூச்சு திணறல், கண் எரிச்சல் ஆகியவையும் ஏற்பட்டன. இந்த விஷ வாயு தாக்குதலுக்கு உள்ளானவர்களில் சுமார் 300 பேர் அன்றைய தினமே பரிதாபமாக மரணம் அடைந்தனர்.

 

உயிருக்கு ஆபத்தான நிலையில் இருந்த ஆயிரக்கணக்கானவர்களை பஸ், லாரி, டெம்போ, கார், ஸ்கூட்டர் என்று எது கிடைத்ததோ, அதில் ஏற்றி ஆஸ்பத்திரிகளுக்கு கொண்டு போனார்கள். ஆஸ்பத்திரிகளில் தாங்க முடியாத கூட்டம் நிரம்பி வழிந்தது. ஆஸ்பத்திரியில் சேர நீண்ட "கியூ" வரிசை நின்று கொண்டிருந்தது.

 

ஒரே நாளில் 6 ஆயிரம் பேர் ஆஸ்பத்திரிகளில் அனுமதிக்கப்பட்டனர். மேலும் ஏராளமானபேர் வந்த வண்ணம் இருந்தார்கள். சிகிச்சை அளிக்க முடியாமல் டாக்டர்கள் திணறினார்கள்.

 

இதுபற்றிய தகவல் கிடைத்ததும் டெல்லியில் இருந்து விமானங்களில் டாக்டர்களை அனுப்ப பிரதமர் ராஜீவ் காந்தி உத்தரவிட்டார். உடனே டாக்டர்கள் விமானம் மூலம் போபால் விரைந்தனர். ராணுவத்தை சேர்ந்த டாக்டர்களும் அழைக்கப்பட்டார்கள்.

 

விஷ வாயுவுக்கு இறந்தவர்கள் எண்ணிக்கை நாளுக்கு நாள் உயர்ந்துகொண்டே சென்றது. ஐந்தே நாட்களில் சாவு எண்ணிக்கை 2,500 ஆக உயர்ந்தது. 50 ஆயிரம் பேர் ஆஸ்பத்திரிகளில் அனுமதிக்கப்பட்டனர். இவர்களில் 10 ஆயிரத்துக்கும் மேற்பட்டவர்கள் கண் பார்வை இழந்தார்கள்.

 

விஷ வாயு தாக்கி மரணம் அடைந்தவர்களின் உடல்களை அடக்கம் செய்யும் பணியில் அரசு அதிகாரிகள் ஈடுபட்டனர். போபால் நகரில் உள்ள பல்வேறு மயானங்களுக்கு பிணங்கள் லாரிகள் மற்றும் டாக்சிகள் மூலம் கொண்டு செல்லப்பட்டன. அங்கு குவியல், குவியலாக பிணங்கள் அடக்கம் செய்யப்பட்டன.

 

மயானங்களுக்கு பிணங்கள் கொண்டு செல்லப்படுவது தெரிந்ததும், மரணம் அடைந்தவர்களின் உறவினர்கள் அங்கு விழுந்தடித்துக்கொண்டு ஓடினார்கள். பிணமாகிவிட்டவர்களுக்கு இறுதி மரியாதை செலுத்தும் போது, கதறி அழுதனர். எல்லா மயானங்களிலும் கூட்டம் அதிகமாக இருந்தது.

 

மரணம் அடைந்தவர்களில் குழந்தைகள்தான் அதிகமாகும். குழந்தைகளின் உடல்களை வெள்ளைத் துணியால் மூடி மயானத்துக்கு கொண்டு வந்து அடக்கம் செய்தனர்.

 

ஊருக்குள் விஷ வாயு பரவி விட்டது என்ற செய்தியை கேள்விப்பட்டதும், உயிர் தப்புவதற்காக பலர் ஊரை காலி செய்துவிட்டு ஓட்டம் பிடித்தார்கள். ஊரில் உள்ளவர்களை எல்லாம் தாக்கிய விஷ வாயு தொழிற்சாலையில் வேலை செய்யும் தொழிலாளர்கள் யாரையும் பாதிக்கவில்லை. இதனால் தொழிலாளர்களுக்கு எந்த ஆபத்தும் ஏற்படவில்லை. தொழிற்சாலைக்கும் சேதம் ஏற்படவில்லை.

 

விஷ வாயு தாக்குதல் காரணமாக போபால் நகரில் அலுவலகங்கள், பள்ளிக்கூடங்கள், கடைகள், ஓட்டல்கள் அனைத்தும் மூடப்பட்டன. மருந்து கடைகள் மட்டுமே திறந்து இருந்தன. இந்த விபத்தை தொடர்ந்து "யூனியன் கார்பைடு" தொழிற்சாலையை மூட உத்தரவிடப்பட்டது.

 

உயிர் இழந்தவர்கள் குடும்பத்துக்கு தலா ரூ.5 ஆயிரமும், பாதிக்கப்பட்டவர்களுக்கு ஆயிரம் ரூபாயும் உதவிப்பணம் வழங்க மாநில அரசு உத்தரவிட்டது. மேலும் பிரதமர் ராஜீவ் காந்தி ரூ.40 லட்சம் வழங்கி உத்தரவிட்டார்.

 

விபத்து ஏற்பட்ட இந்த `யூனியன் கார்பைடு' தொழிற்சாலை அமெரிக்க நிறுவனமாகும். இதன் தலைமை நிறுவனம் அமெரிக்காவில் "வெஸ்ட் லெர்சினியா மாநிலத்தில் தன்டிரி நகரில் உள்ளது. விபத்து குறித்து அந்த நிறுவனத்தின் சுகாதார பிரிவு நிபுணர் ஜாக்சன் கூறியதாவது:-

 

"கடந்த 2 ஆண்டுகளாக இந்த வாயுவை தயாரித்து சேமித்து வைத்து பூச்சிக்கொல்லி மருந்து தயாரித்து வருகிறோம். விபத்து ஏற்பட்டது எப்படி என்பதை ஆராய அமெரிக்காவில் இருந்து நிபுணர் குழு போபால் அனுப்பி வைக்கப்பட்டுள்ளார்கள். இந்த சம்பவத்தில் பலியானவர்களின் குடும்பத்துக்கு எந்த அளவில் உதவி செய்வது என்பது பற்றி இந்திய அரசுடன் கலந்து பேசி முடிவு எடுக்கப்படும்."

 

இவ்வாறு அவர் கூறினார்.

 

ஆந்திராவில் தேர்தல் பிரசாரம் செய்து வந்த பிரதமர் ராஜீவ் காந்தி டெல்லி திரும்பும் வழியில் போபால் சென்றார். யூனியன் கார்பைடு தொழிற்சாலைக்கு சென்று பார்வையிட்டார். விஷ வாயு கசிந்து வெளியேறிய விவரங்கள் கேட்டறிந்தார்.

 

பிறகு ஆஸ்பத்திரிக்கு சென்று அங்கு சிகிச்சை பெற்று வருபவர்களை பார்த்து ஆறுதல் சொன்னார். ஏராளமான குழந்தைகள் சிகிச்சை பெற்று வந்தனர். அந்த குழந்தைகளை அழைத்து பேசினார். ஆஸ்பத்திரிகளில் இடைவிடாது பணிபுரிந்த டாக்டர்கள், ஊழியர்களை ராஜீவ் காந்தி பாராட்டினார். பின்னர் ராஜீவ் காந்தி நிருபர்களிடம் கூறியதாவது:-

"இப்படிப்பட்ட பயங்கரமான தொழிற்சாலை நகரின் மையப்பகுதியில் இடம் பெற்றது தவறு. இனிமேல் இப்படிப்பட்ட தொழிற்சாலைகள் அமைக்கும்போது, தேவையான பாதுகாப்பு முறைகள் கடைபிடிக்கப்பட்டு உள்ளதா என்று கண்காணிக்கப்படும். பெரும்பாலும் அபாயத்தை விளைவிக்கும் தொழிற்சாலைகள் நகரின் மையப்பகுதியில் ஏற்படாமல் பார்த்துக்கொள்ளப்படும். அதற்கு ஏற்ப விரைவில் சட்டங்கள் கொண்டு வரப்படும்.

 

விஷ வாயு தாக்கி ஆஸ்பத்திரியில் சிகிச்சை பெறும் குழந்தைகளை பார்த்தேன். அது நெஞ்சை நெகிழ வைக்கும் நிகழ்ச்சி. அந்தக் குழந்தைகள் தங்கள் பெற்றோர்களை இழந்து அனாதைகளாக நிற்கிறார்கள். அவர்களுக்கு என்ன செய்வது, எப்படி வளர்ப்பது என்பது பற்றி விரைவில் முடிவு எடுத்து அறிவிக்கப்படும்."

 

இவ்வாறு ராஜீவ் காந்தி கூறினார்.

 

இந்த விபத்து பற்றி விசாரணை நடத்த மத்திய பிரதேச ஐகோர்ட்டு நீதிபதி என்.கே.சிங் தலைமையில் விசாரணை கமிஷன் அமைக்கப்பட்டது. அமெரிக்காவை சேர்ந்த தொழில் அதிபர் லாரன் ஆண்டர்சன் என்பவர்தான் "யூனியன் கார்பைடு" தொழிற்சாலையின் நிர்வாக போர்டு தலைவராக இருந்தார். அவர் அமெரிக்காவில் இருந்து விமானம் மூலம் போபால் நகருக்கு வந்தார்.

 

விமான நிலையத்தில் வந்து இறங்கியதுமே அவரை போலீசார் கைது செய்தனர். அவருடன் வந்த 2 அதிகாரிகளும் கைது செய்யப்பட்டார்கள். இதுவரை யூனியன் கார்பைடு தொழிற்சாலையின் இந்திய நிர்வாக அதிகாரி கேசவ மகேந்திரா, மானேஜிங் டைரக்டர் வி.பி.கோகலே ஆகியோரையும் போலீசார் கைது செய்தனர்.

 

இந்த சம்பவம் நடந்த உடனேயே தொழிற்சாலை ஜெனரல் மானேஜர் உள்பட 5 அதிகாரிகள் ஏற்கனவே கைது செய்யப்பட்டனர். கவனக்குறைவு காரணமாக பலர் பலியானதற்கு காரணமாக இருந்ததாகவும், கண் பார்வை இழத்தல் போன்ற கொடூரமான சூழ்நிலை ஏற்படுவதற்கு காரணமாக இருந்ததாகவும் இவர்கள் அனைவர் மீதும் வழக்குப் பதிவு செய்யப்பட்டது.

 கோர்ட்டுகளில் பல ஆண்டுகள் விசாரணை நடந்து முடிந்த பிறகே பாதிக்கப்பட்டவர்களுக்கு நஷ்ட ஈடு தொகை கிடைத்தது.