விண்வெளியில் உங்கள் புகைப்படம் ! ஒரு அரிய வாய்ப்பு

     விண்வெளியில் தங்கள் புகைப்படம் மிதக்க வேண்டும் என்று ஆசைப்படுபவர்களுக்காக, ஒரு புதிய திட்டத்தை அமெரிக்க விண்வெளி ஆய்வு நிறுவனமான "நாசா' அறிவித்துள்ளது. இத்திட்டத்தின் கீழ், புகைப்படத்தை மட்டுமல்லாமல், பெயரையும் விண்வெளியில் மிதக்க விட முடியும்.

விண்வெளிக்கு பறக்க முடியாவிட்டாலும் பரவாயில்லை, நமது முகமாவது பறந்தால் போதும் என்று நினைப்பவர்களுக்காக ஒரு புதிய திட்டத்தை அமெரிக்க விண்வெளி ஆய்வு நிறுவனமான நாசா அறிமுகப்படுத்தியுள்ளது. face in space  என்று பெயரிடப்பட்டுள்ள இத்திட்டத்தின் கீழ், ஒருவர் தனது புகைப்படத்தையோ அல்லது பெயரையோ விண்வெளியில் பறக்க விட முடியும்.

 இத்திட்டத்திற்காக https://faceinspace.nasa.gov என்ற பெயரில் ஒரு இணையதளம் துவக்கப்பட்டுள்ளது. அந்த இணையத்தளத்திற்கான  சுட்டி  தங்களின் புகைப்படத்தை விண்வெளிக்கு அனுப்ப விரும்புபவர்கள் இந்த இணையதளத்தில் தங்களின் புகைப்படத்தை  "அப்லோடு' செய்ய வேண்டும்.இவ்வாறு அனுப்பி வைக்கப்படும் புகைப்படங்கள் மற்றும்  பெயர்களை, விண்வெளிக்கு கொண்டு செல்ல டிஸ்கவரி எஸ்.டி.எஸ்.,-133 மற்றும் எண்டோவர் எஸ்.டி.எஸ்., - 134 என்ற இரண்டு விண்வெளி ஓடங்கள் பயன்படுத்தப்படும். 

"இத்திட்டம் பொதுமக்களுக்காக கொண்டு வரப்பட்டுள்ளது. பொதுமக்களின் புகைப்படங்கள் மற்றும் பெயர்களை விண்வெளி வீரர்கள் கொண்டு சென்று, பூமியின் வட்டப்பாதையில் மிதக்க விடுவார்கள். விண்வெளியில் இருந்து ஓடம் திரும்பியதும், விண்வெளிக்கு சென்று வந்த கமாண்டரின் கையெழுத்துடன் ஒரு நினைவுச் சான்று இன்டர்நெட் மூலம் அனுப்பி வைக்கப்படும்.

இத்திட்டத்தின் மூலம், புகைப்படம் அனுப்பியவர் தனது புகைப்படம் விண்வெளியில் மிதந்து கொண்டிருக்கிறது என்ற இனிய நினைவுகளை பெற முடியும். அவர்  மறைந்தாலும், அவரது புகைப்படம் நீண்ட காலத்திற்கு விண்வெளியில் மிதந்து கொண்டிருந்து, வரலாற்றில் அவரது உருவத்தை  பதிய வைக்கும்'.

 

பூமியை நோக்கி வரும் விண் கற்கள் !

இரண்டு விண்கற்கள் இன்று பூமியை நெருங்கி வருவதாக நாசா தெரிவித்துள்ளது. இதுகுறித்து அமெரிக்க விண்வெளி ஆராய்ச்சி நிறுவனமான ‘நாசா’ கூறியிருப்பதாவது: 

பிரபஞ்சத்தில் ஏராளமான கோள்கள், துணைக் கோள்கள், விண்கற்கள் சுற்றி வருகின்றன. இவற்றில் 2 விண்கற்கள் பூமியை நெருங்கி வருவதை டஸ்கன் நகரில் உள்ள கேடலினா விண்ஆய்வு மையம் கண்டுபிடித்துள்ளது. 2010ஆர்எக்ஸ்30 என்று பெயரிடப்பட்டுள்ள விண்கல் சுமார் 32 முதல் 65 அடி நீளம் இருக்கலாம் என்று தெரிகிறது.

இது  பூமியை 2.46 லட்சம் கி.மீ. தூரத்தில் புதன்கிழமை கடக்கும். 2010ஆர்எப்12 என்ற கல் 20 முதல் 46 அடி நீளம் இருக்கும் என்று தெரிகிறது. இது 78 ஆயிரம் கி.மீ. தூரத்தில் கடந்து செல்லும். பிரபஞ்சத்தை பொருத்தவரை இந்த தொலைவு மிகமிக குறைவு. அதனால், ‘நூலிழையில்’ பூமி தப்பியது என்றே கூறலாம். இந்த கற்களால் பூமிக்கு ஆபத்து இல்லை

ஓசோன் 2010

வரும் 2010 புத்தாண்டு தினத்திலிருந்து, இந்த உலகை அச்சுறுத்தி வந்த, ஓசோன் படலத்தில் துளையிடக்கூடிய குளோரோ புளூரோ கார்பன் (சி.எப்.சி.,), ஹேலான், கார்பன் டெட்ரா குளோரைடு மாசுகள் இந்த உலகிலிருந்து வெளியேறுவது முற்றிலுமாக தடுக்கப்படுகிறது.

சூரியனிலிருந்து வரக்கூடிய புறஊதாக் கதிர்களை, பூமியை சுற்றி உள்ள ஓசோன் படலம் போர்வை போல் காப்பதால், நாம் அதிகப்படியான வெப்பத்திலிருந்து தப்புகிறோம். கடந்த 1970ம் ஆண்டுகளிலிருந்து ஓசோன் படலத்தில் துளை ஏற்பட்டு வருகிறது. இது தொடர்பாக, 1985ல் வியன்னாவில் நடந்த மாநாட்டில் விரிவாக விளக்கப்பட்ட போது உலகம் அதிர்ச்சி அடைந்தது. ஓசோன் துளையால், புவியின் வெப்பநிலை உயர்வுக்கு காரணமாக அமைந்தது. பருவநிலையில் மாற்றம் ஏற்படுவதற்கும் முக்கிய காரணங்களில் ஒன்றாக அமைந்தது.

1987ல் கனடாவில் உள்ள மான்ட்ரியல் நகரில் ஓசோனை காப்பாற்றும் வகையில் ஐ.நா., சார்பில், மாநாடு நடந்தது. ரெப்ரிஜிரேட்டர், ஏர்கண்டிஷனர்களில் பயன்படுத்தப்படும் குளோரோ புளூரோ கார்பன் (சி.எப்.சி.,), தீ அணைப்பு கருவி உள்ளிட்டவற்றில் பயன்படுத்தப்படும் ஹேலான்கள், ஜவுளி மற்றும் மெட்டல் கிளீனிங் தொழிற்சாலைகளில் பயன்படுத்தப்படும் கார்பன் டெட்ராகுளோரைடு மற்றும் தொழிற்சாலைகளில் பயன்படும் மீத்தைல் குளோரோபார்ம் ஆகியவற்றின் உற்பத்தி மற்றும் உபயோகத்தை, 2010ம் ஆண்டுக்குள் படிப்படியாக நிறுத்திவிட வேண்டும் என்று தீர்மானம் இயற்றப்பட்டது. 195 நாடுகள் கையொப்பம் இட்டுள்ள மான்ட்ரியல் உடன்படிக்கையின் படி, தற்போது 97 சதவீத ஓசோனுக்கு கேடு விளைவிக்கும் மாசுகள் தடுக்கப்பட்டுள்ளன. இதுதான், உலகிலேயே மிகவும் வெற்றிகரமாக அமல் செய்யப்பட்ட சர்வதேச சுற்றுச்சூழல் ஒப்பந்தம். 2010ம் ஆண்டிலிருந்து முற்றிலுமாக இந்த மாசுகள் வெளியேறாது. என்றாலும், ஓசோன் படலம் தன்னை சரிசெய்து கொண்டு பழைய நிலைக்கு, 2050ம் ஆண்டில்தான் திரும்பும் என்று 2006ல் நடந்த ஓசோன் துளை தொடர்பான அறிவியல் பூர்வ மதிப்பீடு தெரிவித்துள்ளது.

உலகம் முழுவதும், தற்போது ஏர்கண்டிஷனர் மற்றும் பிரிட்ஜ்களில் சி.எப்.சி.,களுக்குப் பதிலாக, ஓசோனுக்கு கேடு விளைவிக்காத "ஹைட்ரோபுளூரோ கார்பன்' மற்றும் "ஹைட்ரோகார்பன்கள்' பயன்படுத்தப்பட்டு வருகின்றன. ஓசோனுக்கு கேடு விளைவிக்காவிட்டாலும், கார்பன் டை ஆக்சைடைப் போலவே இவையும் பசுமை இல்ல விளைவை ஏற்படுத்துவதால் புவியின் வெப்பநிலை உயர்வுக்கு காரணமாக அமைகின்றன. எனவே, அடுத்து இவற்றையும் முற்றிலும் நீக்கும் முயற்சிகளும் சவால் நிறைந்ததாகவே தொடர்ந்து வருகின்றன. 1931ல் அமெரிக்காவிலுள்ள நியூஜெர்சியில் "டுயுபாண்ட்' எனும் நிறுவனம்தான் முதன் முதலில், சி.எப்.சி.,யில் தயாரிக்கும் தொழிற்சாலையை தொடங்கியது. தற்போது இதுபோன்று "சி.எப்.சி.,' உற்பத்தி தொழிற்சாலைகளுக்கு முடிவு வந்துவிட்டது என்று கூறலாம். சட்டவிரோதமாக ஒரு நாட்டிலிருந்து இன்னொரு நாட்டுக்கு ஓசோனுக்கு கேடு விளைவிக்கும் பொருட்களை கடத்துவதை தடுக்கவும், ஐ.நா.,வின் சர்வதே சுங்க நிறுவனம் கடினமான சுற்றுச்சூழல் குற்ற சட்ட விதிமுறைகளை அமல் செய்துள்ளது.

இந்தியா வெற்றிகரமாக இலக்கை அடைந்துள்ளது குறித்து, புதுடில்லியில் உள்ள மத்திய அரசின் "ஓசோன் செல்' இயக்குனர் துரைசாமி, தினமலர் இதழுக்கு அளித்த பேட்டி: இந்தியா 1992ல் மான்ட்ரியல் உடன்படிக்கையில் கையெழுத்திட்டது. 2003ம் ஆண்டிலிருந்து இந்தியாவில் பிரிட்ஜ்களில் சி.எப்.சி., உபயோகம் நிறுத்தப்பட்டது. அதற்கு பதிலாக "ஆர் 134-ஏ' எனும் ஓசோனுக்கு கேடு விளைவிக்காத பொருள் பயன்படுத்தப்படுகிறது. சில நிறுவனங்கள் ஹைட்ரோகார்பன் பயன்படுத்துகின்றன. 2008 ஆக. 1லேயே இந்தியாவில் சி.எப்.சி., உபயோகம் மற்றும் உற்பத்தி முழுவதுமாக நிறுத்தப்பட்டு விட்டது. இது 2010ம் ஆண்டுக்கு முன்னரே இந்தியா தனது கடமையை செய்துவிட்டது. ஹேலான்களை 2002ல் இந்தியா முழுவதுமாக குறைத்துக் கொண்டது.

கார்பன் டெட்ரா குளோரைடைப் பொறுத்தவரை 2007லேயே 85 சதவீதத்தை இந்தியா குறைத்துக் கொண்டது. தற்போது முற்றிலும் குறைத்துவிட்டது. இந்தியாவில் ஓசோனுக்கு கேடு விளைவிக்கும் பொருட்களை ஒழித்துக் கட்டியபோதே, நிறுவனங்கள் புதிய தொழில்நுட்பங்களுக்கு மாறிக் கொள்வதற்கான நிதி ஒதுக்கீடு அளித்துள்ளதால் நிறுவனங்கள் பொருளாதார ரீதியில் பாதிப்படையவில்லை. ஆஸ்துமா நோயாளிகளுக்கான இன்ஹேலர்கள் தயாரிப்பில் மட்டுமே இனி சி.எப்.சி., இருக்கும். அது மான்ட்ரியல் வரைமுறையின் படி, அனுமதிக்கப்பட்டதுதான். இவ்வாறு அவர் தெரிவித்தார். மான்ட்ரியல் உடன்படிக்கையை சிறந்த முறையில் அமல் செய்த நாடு என்பதற்கான ஐ.நா.,வின் விருதையும் இந்தியா பெற்றுள்ளது. ஓசோனுக்கு கேடு விளைவிக்கும் பொருட்களுக்கு விடை கொடுத்து புதிய சுவாசத்துடன் 2010 புத்தாண்டு விடியப்போகிறது.

உருகும் பனி: ஆர்க்டிக் மற்றும் அண்டார்டிகா பகுதியில் ஓசோன் இழப்பு குளிர்காலத்தில் அதிகமாக ஏற்படுகிறது. அப்போது வெப்பநிலை - 78 டிகிரிக்கு செல்லும் போது, குளிர்ச்சி அடைந்த மேகங்கள் பனிக்கட்டிகளாக மாறுகின்றன. இந்த பனியில் மாசுகளான நைட்ரிக் அமிலம், சல்பியூரிக் அமிலம் ஆகியன கலந்து குளோரோ புளூரோ கார்பன் (சி.எப்.சி.,) வினைபுரிய தூண்டுகின்றன. ஆகவே அப்பகுதியில் வெப்பம் அதிகரித்து பனி உருக காரணமாக அமைகின்றன. கடந்த 30 ஆண்டுகளில் இல்லாத அளவுக்கு தற்போது அண்டார்டிகா பகுதியில் ஓசோனில் துளை ஏற்பட்டுள்ளது.

பூமியை காக்க: வளிமண்டலத்தில் சேர்ந்துள்ள மாசுகளில் கார்பன் டை ஆக்ச�டு 86 சதவீதம். "ஓசோனுக்கு கேடு விளைவிக்கும் சி.எப்.சி., உபயோகத்துக்குப் பதிலாக ஹைட்ரோபுளூரோகார்பன் பயன்படுத்துவதால் அது வளிமண்டலத்தில் இந்த மாசு அளவு 9 சதவீதமாக கடந்த 5 ஆண்டுகளில் அதிகரித்துள்ளது' என்று சர்வதேச தட்பவெப்பநிலை நிறுவன தலைமை செயலாளர் மைக்கேல் ஜக்கார்ட் தெரிவித்துள்ளார். இவையும் புவி வெப்பமாக காரணமாக அமைகின்றன.

ஓசோனுக்கு கேடு விளைவிக்கும் ரசாயனங்களை குறைத்தது போல், தொழிற்சாலை, வாகன மற்றும் பிற மாசுகளின் வெளியேற்றத்தை கட்டுப்படுத்த, டிசம்பர் 15ல் கோபன்ஹேகனில் நடைபெறும் உச்சி மாநாட்டில் நாடுகளுக்கு இலக்கு நிர்ணயிக்கப்படுகிறது. வளர்ந்த நாடுகளும் பிற நாடுகளும் அதை சரியாக கடைபிடிக்கும் பட்சத்தில் இந்த பூமி நாம் வாழத்தகுந்ததாக தொடரும்.

காடுகளுக்கு பாதிப்பு: ஓசோனில் ஏற்பட்டுள்ள துளை புவி வெப்பமயமாவதற்கு காரணமாக அமைவதால் காடுகளின் அடர்த்தி குறைகிறது. காடுகள் அழிவதாலும், மனித தேவைகளுக்கு அழிப்பதாலும் கார்பன் மறு சுழற்சி பாதிக்கப்படுவதால், புவி மேலும் வெப்படைகிறது.

பருவநிலை மாற்றம்: வெப்பம், ஈரப்பதம், காற்று மற்றும் வளிமண்டலத்தில் உள்ள ரசாயனப் பொருட்கள் ஓசோனை பாதிக்கின்றன. ஓசோன் பாதிக்கப்பட்டால் சூரியனின் புற ஊதாக் கதிர்கள் பூமியை அடைவதால் பருவ நிலை மேலும் பாதிக்கிறது. பருவநிலை பாதிப்பு வறண்ட பூமியையும் மகசூலில் பாதிப்பையும் ஏற்படுத்தி விவசாயத்துக்கு பெரிய இழப்பை ஏற்படுத்துகின்றன.

அண்டார்டிகா பகுதியில் ஏற்பட்டுள்ள துளை தற்போது கடந்த 30 ஆண்டுகளில் இல்லாத அளவில் பெரிதாக உள்ளது. தரையிலிருந்து 50 கி.மீ., தொலைவில் உள்ள ஸ்ராடஸ்பியர் வளிமண்டல பகுதியில்தான் ஓசோன் வாயு காணப்படுகிறது. சூரியனிலிருந்து வரும் அதிக வெப்பமிக்க, தோல் புற்றுநோய் ஏற்படுத்தக்கூடிய புற ஊதாக் கதிர்களை இந்த வாயுப்படலம் பிரதிபலித்து பூமியில் விழாமல் தடுத்து விடுகிறது. இதனால் மனிதர்கள், தாவரங்கள் மற்றும் விலங்குகள் காக்கப்படுகின்றன. ஓசோன் துளை உள்ள இடங்களில் புற ஊதாக் கதிர்கள் புகுந்துவிடுவதால், பூமியின் தரைப்பகுதியில் வெப்பத்தை அதிகரிக்கிறது.

வெடித்து சிதறும் நிலையில் ராட்சத நட்சத்திரம்

அண்டவெளியில், இதுவரை மனித ஆய்வுக்கு புலப்படாத எண்ணற்ற நட்சத்திரங்கள் உள்ளன. இவற்றில் பல, சூரியனைக் காட்டிலும் பல நூறு மடங்கு பெரியவை. எரிந்து கொண்டிருக்கும் இந்த நட்சத்திரங்களில் இருந்து ஏராளமான வெப்பம், ஒளி, சக்தி வெளியாகிக் கொண்டிருக்கின்றன. பல கோடி ஆண்டுகளாக உள்ள இந்த நட்சத்திரங்கள், ஒரு கட்டத்தில் தங்கள் சக்தியை இழந்து, வெடித்துச் சிதறுகின்றன.

இதுபோன்ற, இறக்கும் நிலையில் உள்ள நட்சத்திரம் ஒன்று, சமீபத்தில் கண்டுபிடிக்கப்பட்டுள்ளது. கடந்த மே மாதத்தில், "ஹெர்செல்ஸ்' என்ற விண்வெளி தொலைநோக்கி ஒன்றை, லண்டனில் உள்ள ராயல் விண்வெளி ஆய்வுமையம் விண்ணில் செலுத்தியது.அண்டவெளியில் உள்ள நட்சத்திரங்கள் குறித்து, நிறமாலை ஆய்வுக் கருவி (ஸ்பெக்ட்ரோஸ்கோபிக்) உதவியுடன், இந்த விண்வெளி தொலைநோக்கி ஆய்வு செய்தது. அதில், இறக்கும் நிலையில் உள்ள நட்சத்திரம் ஒன்று கண்டுபிடிக்கப்பட்டுள்ளது."வி.ஒய்.,கேனிஸ் மேஜோரிஸ்' என்ற பெயர் கொண்ட அந்த நட்சத்திரம் வித்தியாசமானதாகவும், சூரியனை விட 30 முதல் 40 மடங்கு பெரியதாகவும் உள்ளது. பூமியில் இருந்து, நான்கு ஆயிரத்து 500 ஒளி ஆண்டுகள் தொலைவில் இந்த நட்சத்திரம் எரிந்து கொண்டிருக்கிறது."வி.ஒய்.,கேனிஸ் மேஜோரிஸ்' நட்சத்திரத்தில் இருந்து அணுக்களும், மூலக்கூறுகளும் சுழற்றி, வெளியே வீசி எறியப்படுவது தொலைநோக்கி மூலம் கண்டறியப்பட்டுள்ளது. அந்த நட்சத்திரம், இயல்பு அளவை விட அதிகமாக ஒளி வீசும் "சூப்பர்நோவா' நிலையை அடைந்துள்ளது.

எனவே, எந்த நேரத்திலும் அந்த நட்சத்திரம் வெடிக்கும் என எதிர்பார்க்கப்படுகிறது. நட்சத்திர கூட்டத்தில், கடந்த 200 ஆண்டுகளாக"வி.ஒய்.,கேனிஸ் மேஜோரிஸ்' நட்சத்திரம் உள்ளதை, விண்வெளி ஆய்வாளர்கள் பதிவு செய்துள்ளனர். இறக்கும் நிலையில் உள்ள இந்த நட்சத்திரம், தற்போது உட்கருவில் உள்ள எரிபொருளை மிக வேகமாக எரித்து வருகிறது. இதனால் இது சிவப்பு நிறத்தில் மிகப் பெரிய ஒரு ராட்சஷன் போல் காணப்படுகிறது."ஹெர்செல்ஸ்' தொலைநோக்கியில் நிறமாலை கருவியுடன் இணைக்கப்பட்டுள்ள "பேக்ஸ் அண்டு ஸ்பியர்' என்ற கருவி உதவியுடன் ஆய்வு செய்ததில் "வி.ஒய்.,கேனிஸ் மேஜோரிஸ்' நட்சத்திரத்தைச் சுற்றி கடல் அலை போல் மேகக்கூட்டம் திரண்டு காணப்படுகிறது.

மேலும், நட்சத்திரத்தின் வெடிப்பில் இருந்து வெளிப்படும் ஒளியின் அலை நீளத்தை நிறமாலை கருவி கொண்டு, இறந்து வரும் நட்சத்திரத்தில் ஒளி தோன்றுவதற்கான ரசாயனம் என்ன என்பது குறித்து ஆய்வு நடத்தப்பட்டு வருகிறது. "வி.ஒய்.,கேனிஸ் மேஜோரிஸ்' நட்சத்திரத்திற்கு அருகில் ஏராளமான கார்பன் மோனாக்சைடு மற்றும் நீர் உள்ளது.இங்கிலாந்தில் உள்ள கார்டிப் பல்கலைக்கழகத்தின் பேராசிரியர் மேட் கிரிப்பின், பால்வெளி மண்டலம் சுருள் வடிவில் காணப்படுவதற்கான கொள்கைகள் குறித்து பல விஷயங்களை கண்டுபிடித்துள்ளார். இதுகுறித்து அவர் கூறுகையில்,"இங்குள்ள கார்பன்மோனாக்சைடு வாயு அடுக்குகளின் வெப்பநிலையுடன், வி.ஒய்.,கேனிஸ் மேஜோரிஸ்' நட்சத்திரத்திற்கு அருகில் உள்ள கார்பன் மோனாக்சைடு வாயு அடுக்குகளின் வெப்பநிலை, அடர்த்தி, இங்கிருந்து உள்ள தொலைவு உள்ளிட்டவைகள் ஒப்பிடப்பட்டுள்ளன.

இந்த ஆய்விலிருந்து, அங்குள்ள வாயு அடுக்குகளில் நீர் அதிகமாக இருக்கிறது. இது, அங்குள்ள வாயுக்களில் இயற்பியல் மற்றும் ரசாயன மாற்றங்கள் அதிகளவில் நடந்து வருவதை காட்டுகிறது.மேலும், மேகம் போன்று காணப்படும் வாயு மற்றும் தூசிக் கூட்டத்தின் ஒரு முனையில் தான், இந்த வி.ஒய்.,கேனிஸ் மேஜோரிஸ்' நட்சத்திரம் அமைந்திருப்பது தெரிய வந்துள்ளது' என்றார்.வி.ஒய்.,கேனிஸ் மேஜோரிஸ்' நட்சத்திரம் அதன் எடையை இழந்து வருவதுடன் அதன் மேல் பகுதி விரிவடைந்து வருகிறது. இதனால் இந்த நட்சத்திரம் இறக்கும் நிலையில் உள்ளது என்பது, இந்த ஆய்வு மூலம் தெரிய வருகிறது.பிரம்மாண்ட நட்சத்திரம் வெடித்துச் சிதறுவதால், விண்வெளியில் பாதிப்பு ஏற்படுமா என்ற கேள்விக்கு, இதுபோன்று ஏராளமான நட்சத்திரங்கள் வெடித்துச் சிதறியிருக்கின்றன. அதுபோன்ற நேரங்களில் எந்த பாதிப்பும் இல்லை. எனவே, இப்போதும் இருக்காது என்று ஆய்வாளர்கள் கருத்து தெரிவித்துள்ளனர்.

முதல் விண்வெளி ஓட்டல் 2012ல் திறப்பு

பார்சிலோனா, : உலகின் முதல் விண்வெளி ஓட்டல் கேலாக்டிக் சூட், 2012ல் திறக்கப்படுகிறது. ரூ.14,100 கோடியில் அமைக்கப்படும் அந்த ஓட்டலில் 3 நாள் தங்க கட்டணம் ரூ.20.7 கோடி. விண்வெளி ஆராய்ச்சியில் முன்னாள் பொறியாளர், சேவியர் கிளாரமன்ட். இவர் கேலாக்டிக் சூட் என்ற பெயரில், விண்வெளியில் சொகுசு ஓட்டல் அமைப்பதில் ஈடுபட்டுள்ளார். 2012ல் அதை திறக்க திட்டமிட்டு உள்ளார். விண்வெளி ஓட்டல் அமைக்க ரூ.14,100 கோடி செலவிடப்படுகிறது. கேலக்டிக் சூட் திறக்கப்பட்டதும், அங்கு 3 நாட்கள் தங்க ரூ.20.7 கோடி கட்டணம் செலுத்த வேண்டும்.

முன்பதிவு செய்வோருக்கு, பயண தினத்துக்கு 8 வாரங்கள் முன்பிருந்து பயிற்சி வகுப்புகள் நடத்தப்படும்.ஒவ்வொரு முறையும் 4 பேர் ஓட்டலுக்கு செல்லலாம். அவர்களுடன் 2 விண்வெளி வீரர்கள் வருவார்கள். பூமியில் இருந்து 450 கி.மீ. உயரத்தில் அமையும் ஓட்டல் என்பதால், பயணிகள் மிதக்க வேண்டியிருக்கும். எனவே, விண்வெளி வீரர்களுக்கான வெல்க்ரோ உடைகள் தரப்படும். அதை அணிந்து ஓட்டல் அறைகளின் சுவரைப் பிடித்து ஸ்பைடர்மேன் போல விருந்தாளிகள் நகரலாம். ஓட்டலை ராக்கெட் மூலம் அடைய ஒன்றரை நாள் ஆகும். விண்வெளி ஓட்டல், மணிக்கு 30,000 கி.மீ. வேகத்தில் சுற்றும். அதில் 80 நிமிடத்துக்கு ஒருமுறை பூமியை சுற்றி வரலாம். அதன்படி 24 மணி நேரத்தில் சூரியன் தோன்றி மறைவதை 15 முறை பார்க்கலாம். விண்வெளி ஓட்டலில் தங்க 200 பேர் ஆர்வம் தெரிவித்துள்ளனர். www.galactic suite.com என்ற இணையதளம் மூலம் 43 பேர் முன்பதிவு செய்து விட்டனர்.

இந்தியாவில் தயாரிக்கப்பட்ட கிரையோஜெனிக் இயந்திரம்

உள்நாட்டில் உருவான கிரையோஜெனிக் இயந்திரம் விண்ணில் பறக்க தயார்

செப்டம்பர் 29,2009,00:00 IST

திருநெல்வெலி : இந்திய தொழில்நுட்பத்தில் உருவான கிரையோஜெனிக் எரிபொருள்இயந்திரத்தின் மூலம் வரும் டிசம்பரில் ஜி.எஸ்.எல்.வி.,ராக்கெட் விண்ணில் ஏவப்படும் என இஸ்ரோ தலைவர் மாதவன் நாயர் தெரிவித்தார். திருநெல்வேலி மாவட்டம் காவல்கிணறு அருகே மகேந்திரகிரி மலைப்பகுதியில் இந்திய விண்வெளி ஆய்வு மையத்தின் கட்டுப்பாட்டில் செயல்படும் "திரவ திட்ட இயக்க மையம்' உள்ளது.

ராக்கெட்டின் உந்து சக்தியாக விளங்கும் கிரையோஜெனிக் இயந்திரத்தின் சோதனை தளமாக மகேந்திரகிரி மையம் செயல்படுகிறது. இதற்கு முன்பு ரஷ்யாவின் தொழில்நுட்பத்துடன் கூடிய கிரையோஜெனிக் இயந்திரங்களை இந்தியா பயன்படுத்தி வந்துள்ளது. முதன்முறையாக இந்திய தொழில்நுட்பத்தில் கிரையோஜெனிக் இயந்திரம் வடிவமைக்கப்பட்டுள்ளது. மகேந்திரகிரியில் நடந்த இதற்கான சோதனைகள் வெற்றியடைந்துள்ளன. மையத்தை நேற்று இஸ்ரோ தலைவர் மாதவன் நாயர் பார்வையிட்டார். விஞ்ஞானிகளுடன் கலந்துரையாடலில் ஈடுபட்டார்.

பின்னர் அவர் கூறியதாவது: அதிக எடை கொண்ட செயற்கைக் கோள்களை ஏவுவதற்கு பயன்படும் ஜி.எஸ்.எல்.வி. ராக்கெட்களை செலுத்த எடை குறைந்த திரவ எரிபொருளில் இயங்கும் கிரையோஜெனிக் இயந்திரம் பயன்படுகிறது. முதன்முறையாக இந்திய தொழில்நுட்பத்திலேயே தயாரான கிரையோஜெனிக் இயந்திரம் வரும் டிசம்பரில் தகவல் பரிமாற்றத்திற்காக விண்ணில் செலுத்தப்பட உள்ள ஜி.எஸ்.எல்.வி.,மார்க் 3 ராக்கெட்டில் பயன்படுத்தப்படுகிறது. முழுக்க முழுக்க இந்திய தொழில்நுட்பத்தில் தயாரான கிரையோஜெனிக் பயன்பாட்டிற்கு வருவதில் பெருமிதம் கொள்வோம். சந்திரயான் 1 வெற்றியை தொடர்ந்து சந்திரயான் 2 விண்கலம் வரும் 2010ம் ஆண்டின் இறுதியிலோ 2013ம் ஆண்டில் துவக்கத்திலோ ஏவப்படும் என்றார்.