சின்ன சின்ன ஆசை: இயற்கை

இயற்கை லேபிளுடன் இடுகைகளைக் காண்பிக்கிறது. அனைத்து இடுகைகளையும் காண்பி

வெள்ளி, 18 டிசம்பர், 2009

செயற்கை கலப்பில்லாத இயற்கை ஆதரவு திருமணம்

மின்னொளி விளக்குகள் இல்லை, எங்கும் பிளாஸ்டிக் டம்ளர்கள் இல்லை, தாம்பூல கவரில்லை... விருந்தில் இடம்பெற்ற காய்கறியில் ரசாயன கலப்பில்லை. இப்படி முற்றிலும் இயற்கை ஆதரவு திருமணம் அகமதாபாத்தில் நடந்துள்ளது.

குஜராத்தைச் சேர்ந்த அருஷி ஷா (22), தீபன் ஷா (24) ஜோடிக்கு கடந்த ஞாயிறன்று திருமணம் நடந்தது. மணமகன் பருத்தி வேட்டி அணிந்திருக்க, மணமகள் காதி பட்டு சேலையில் இருந்தார். விருந்து நடைபெறும் இடத்தில் பன்னீர் டிக்கா, ஸ்பிரிங் ரோல் இல்லை. மாறாக, வேக வைத்த கடலை, பழங்கள் இருந்தன.

திருமண சீதனமாக அருஷி கொண்டு வந்தது ஒரு பசுவும் கன்றும். திருமணத்தில் பிளாஸ்டிக் பொருட்களுக்கு அறவே தடை. பரிசுப் பொருட்களிலும் பிளாஸ்டிக் தவிர்க்க, பத்திரிகையில் வேண்டுகோள் இருந்தது. மாறாக, உபயோகத்தில் இருந்த பொருட்கள் அனைத்தும் செப்பு, வெள்ளி, பித்தளையில் இருந்தன.

மணமகள் குடும்பத்தினர் பணக்காரர்கள் என்ற போதிலும், திருமணம் வீட்டில் எளிமையாக நடந்தது. முதல்நாள் வரவேற்பில் பங்கேற்ற விருந்தினர்களுக்கு முற்றிலும் ரசாயனக் கலப்பின்றி விளைவிக்கப்பட்ட காய்கறிகளால், தூய நல்லெண்ணையில் தயாரான புலாவ் பரிமாறப்பட்டது.
இயற்கைக்கு மாறான பொருட்களால் சுற்றுச்சூழல் சீர்கெட்டு பூமி சூடாகும் பிரச்னையைத் தடுப்பது பற்றி டென்மார்க் நாட்டின் கோபன்ஹெகனில் சர்வதேச மாநாடு நடந்து கொண்டிருக்கிறது. அதுபோன்ற பெரிய ஏற்பாடுகள் ஏதும் தேவையில்லை. அருஷி, தீபன் போன்ற ஜோடிகள் செய்த முயற்சியே போதுமானது.

திங்கள், 7 டிசம்பர், 2009

புவி வெப்பத்தை குறைப்பதில் நமது பங்கு?

புவிவெப்பத்தைக் குறைப்பதில் தனது பங்கு என்ன என்பதை அமெரிக்கா அறிவித்துவிட்டது. அதாவது 2005-ம் ஆண்டு வெளியேற்றிய பசுமை இல்ல வாயுக்களின் அளவில் 18 சதவீதம் குறைத்துக் கொள்ளப்போவதாக தெரிவித்திருக்கிறது.
வளரும் நாடுகளில் மிக அதிகமாக பசுமை இல்ல வாயுக்களை வெளியேற்றும் சீனா, தான் 35 முதல் 40 விழுக்காடு குறைக்கப் போவதாக அறிவித்துள்ளது. சீனாவைப் போலவே இந்தியாவும் ஓரளவு இதே அளவை அறிவித்தாக வேண்டிய கட்டாயத்தில் இருக்கிறது.தற்போது வெளியேற்றப்படும் பசுமை இல்ல வாயுக்களின் அளவை இந்தியா 40 சதவீதம் குறைத்துக் கொள்ள வேண்டுமானால், அதற்காக இந்தியா இழக்க வேண்டிய தொழில்வளர்ச்சியும் எதிர்கொள்ள வேண்டிய செலவினங்களும் மிக அதிகம்.

இந்தியாவின் மின்உற்பத்தியில் பெரும்பங்கு அனல்மின் நிலையங்களிலிருந்துதான் கிடைக்கிறது. இவற்றின் மூலம் வெளியேற்றப்படும் கரியமில வாயு அளவும் அதிகம். இதற்காக அனல்மின் நிலையங்களை உடனடியாக மூடுவதோ, மின்உற்பத்தியைக் குறைத்துக்கொள்வதோ இயலாத காரியம்.இந்தியாவில் சூரியசக்தி மூலமாக மின்சாரம் தயாரித்து, இழப்பை ஈடு செய்ய முடியும் என்பது உண்மையே என்றாலும், அதற்காகும் செலவு பல ஆயிரம் கோடி ரூபாய். இதில் ஒரு பகுதியை ஐக்கிய நாடுகள் சபை வழங்கும் என்றாலும், புதிய மின்உற்பத்தி முறைக்கு அது முற்றிலும் பயன் அளிக்காது. தொ ழில்துறைகளில் வெளியேற்றப்படும் கரியமில வாயு அளவைக் குறைப்பதற்காக, தொழிற்கூடங்களில் புதிய தொழில்நுட்பத்தைப் புகுத்த வேண்டுமானால், அதற்காக இத்தொழில் துறைக்கு மானியம் மற்றும் சலுகைகள் அறிவித்தாக வேண்டும். இதனால் இந்தியாவுக்கு பெரும் வருவாய் இழப்பு ஏற்படும். வளர்ச்சிப் பணிகள் தடைப்படும்.இந்தியா அதன் பிரச்னையை எதிர்கொள்ளும் அதே வேளையில், இந்தியர் என்ற முறையில் ஒவ்வொருவரும் புவிவெப்பத்தைக்குறைக்க சில வழிகள் இருக்கின்றன.
மின்சாரத்தை அளவாகப் பயன்படுத்துவது, வாகனப் பயன்பாட்டைக் குறைத்துக்கொள்வது, சீர்வளி அரங்குகள் மற்றும் குளிர்பதன பெட்டி பயன்பாட்டை கட்டுக்குள் வைப்பது போன்றவற்றை மேற்கொள்ளலாம். இவை யாவற்றையும் காட்டிலும் மிக அதிகமாக ஒரு மனிதன் இந்தப் புவிக்கு நன்மை செய்ய விரும்பினால், அவர் சைவ உணவுக்கு மாறுவதன் மூலம் அதைச் செய்ய முடியும்.அண்மை யில் மத்திய சுற்றுச்சூழல் அமைச்சர் ஜெய்ராம் ரமேஷ் குறிப்பிடுகையில் "மாட்டிறைச்சி சாப்பிடுவதை நிறுத்துவதன் மூலம் புவிவெப்பத்தைக் குறைக்கலாம்' என்று கூறிய கருத்து உண்மையே. இதை நோபல் பரிசு பெற்றவரும் ஐக்கியநாடுகளின் ஒரு பிரிவாகிய பருவநிலை மாற்றத்துக்கான சர்வதேச அமைப்பின் தலைவர்ராஜேந்தர் கே. பச்செüரி பல கருத்தரங்குகளில் தொடர்ந்து வலியுறுத்தி வருகிறார்.

ஒரு கிலோ மாட்டிறைச்சியைத் தவிர்ப்பதன் மூலம் வளிமண்டலத்தில் 36.4 கிலோ கரியமில வாயு கலப்பதைத் தவிர்க்க முடியும் என்று அவர் சொல்வது வெறும் புள்ளிவிவரம் அல்ல. நடைமுறை வாழ்க்கைக்கு சாத்தியமானதும்கூட. ஆடு, மாடுகள் வளர்ப்பதற்காக அழிபடும் காடுகள், இறைச்சியை வேறு இடங்களுக்குக் கொண்டு செல்வதற்கான வாகனப் போக்குவரத்து, இறைச்சியை குளிர்பதனப் பெட்டியில் வைத்திருத்தல் போன்ற தொடர்நடவடிக்கையால் ஏற்படும் கரியமில வாயுவை கணக்கிட்டு இந்தக் கணக்கீடு செய்யப்படுகிறது.இறைச் சிக் கடைகள் என்பது ஊருக்கு ஒரு சிலவாக இருந்த நாள்கள் என்பது முற்றிலுமாக மாறிப்போய், இப்போது எல்லா நாள்களிலும் எல்லா இடங்களிலும் தெருவுக்குத் தெரு இறைச்சிக் கடைகளும், பிரியாணிக் கடைகளும் இருப்பதைக் காண்கிறோம். 2006 ம் ஆண்டு உலகம் முழுவதும் 28 கோடி டன் இறைச்சி உணவுக்காக பயன்படுத்தப்பட்டுள்ளது. இது ஐம்பது ஆண்டுகளுக்கு முன்பு இருந்த அளவைக் காட்டிலும் 5 மடங்கு அதிகம்.ஒரு எக்டேர் நிலப்பரப்பில் வேளாண்மை செய்து உருவாக்கப்படும் காய்கறி, கனிகள் பருப்புவகைகள் மூலம் ஒரு ஆண்டுக்கு 30 பேருக்கு உணவளிக்க முடியும்.

ஆனால் இதே நிலப்பரப்பை கால்நடை வளர்ப்புக்குப் பயன்படுத்தி அதன் மூலம் கிடைக்கும் முட்டை, பால்,இறைச்சி ஆகியவற்றின் மூலம் ஒரு ஆண்டுக்கு 10 பேருக்கு மட்டுமே உணவளிக்க முடியும் என்றும் கணக்கிடப்படுகிறது.ஒரு கிலோ கிராம் மாட்டிறைச்சி பெறுவதற்கு 10 கிலோ கால்நடைத் தீவனம் தேவைப்படுகிறது. ஒரு கிலோ பன்றிக் கறிக்கு 5 கிலோ தானியமும் ஒரு கிலோ கோழிக்கறிக்கு 3 கிலோ தானியம் தேவையாக இருக்கிறது. ஆனால் இந்த தானியத்தைக் கொண்டு பல வேளை உணவை ஒரு மனிதன் உண்ண முடியும். மேலும், காய்கறி உணவைச் சமைக்கத் தேவைப்படும் எரிசக்தியைக் காட்டிலும் இறைச்சி உணவு தயாரிக்க 25 மடங்கு எரிசக்தி தேவையாக இருக்கிறது. இவை யாவற்றையும் கருத்தில் கொள்ளும்போது, ஒருவர் சைவ உணவுக்கு மாறுவது மண்ணுலகிற்கு மட்டுமல்ல, வளிமண்டலத்திற்கும் நன்மை செய்ய முடியும்.சைவ உணவு மனிதருக்கு எளிமையான உணவு என்பதுடன், வளிமண்டலத்தை மாசுபடுத்தும் பசுமை இல்ல வாயுக்களில் கரியமில வாயுவைவிட 30 மடங்கும் அதிக தீமை விளைவிக்கும் மீத்தேன் வாயுக்கு இறைச்சி காரணமாக இருக்கிறது என்பதை எண்ணும் போது, இந்தியர்கள் ஒவ்வொருவரும் மாமிச உணவைத் தவிர்ப்பதும், வசதிகளைக் குறைத்துக் கொண்டு எளிய வாழ்க்கை வாழ்வதும் அர்த்தமுள்ள வாழ்க்கையாக இருக்கும்.

மேலும், புவி வெப்பத்தைக் குறைத்து பருவநிலை மாற்றங்களை கட்டுக்குள் கொண்டுவரவும் உதவும். ஒவ்வொருவரும் தங்களால் இயன்ற அளவில் வளிமண்டலத்தைக் காப்பது என்று உறுதியை ஏற்றுக் கொண்டால், புவியைக் காக்கலாம். நாடு அதனளவில் பசுமை இல்ல வாயுக்களைக் குறைக்க முற்படும்போது குடிமகன்களாகிய நாமும் நம்மால் முடிந்த பங்களிப்பைச் செய்தால் என்ன!

நன்றி: தினமணி

வெள்ளி, 27 நவம்பர், 2009

இயற்கையை நேசிப்போம்:பாதுகாப்போம்

அமெரிக்கர்களைப்போல உலகில் உள்ள அனைவரும் வாழ வேண்டும் என்றால் தற்போது உள்ளதைப் போன்று 5 பூமிகள் இருக்க வேண்டும் என அமெரிக்காவில் வாஷிங்டனை மையமாகக் கொண்டு செயல்படும் "குளோபல் ஃபுட்பிரிண்ட் நெட்வொர்க்' என்ற அமைப்பு ஆய்வு மேற்கொண்டு கடந்த செவ்வாய்க்கிழமை வெளியிட்ட ஆவணத்தில் தெரிவித்துள்ளது.நாம் வெளியிடும் கரியமில வாயுவை பூமி மறுசுழற்சி செய்து வெளியிடும் வேகத்தைவிட 44 சதவீதம் வேகமாக இயற்கை வளங்களை நாம் பயன்படுத்துகிறோம். அதாவது ஓராண்டில் நாம் பயன்படுத்திய இயற்கை வளங்களை மறு சுழற்சி செய்து மறுபடியும் நமக்கு அளிக்க இயற்கைக்கு ஒன்றரை ஆண்டுகள் தேவைப்படுகிறதாம்.இதேரீதியில் நாம் செயல்பட்டால், 2030 வாக்கில் தற்போது உள்ளதைப் போன்று இயற்கை வளங்களுடன் கூடிய இன்னும் ஒரு பூமி தேவை என்றும் அந்த அமைப்பு தெரிவித்துள்ளது.1961-ல் உலக இயற்கை வளத்தில் பாதி அளவுக்குத்தான் பயன்படுத்தியுள்ளோம். சராசரி அமெரிக்கர் 23 ஏக்கர் பரப்பளவில் உள்ள இயற்கை வளங்களை அனுபவிக்கிறார். சராசரி ஐரோப்பியர் அதில் பாதி அளவு பரப்பளவில் உள்ள இயற்கை வளங்களை அனுபவிக்கிறார்.ஆனால், மலாவி, ஹைதி, நேபாளம், வங்கதேசம் போன்ற நாடுகளில் உள்ளவர்கள் 1.25 ஏக்கர் பரப்பளவில் உள்ள இயற்கை வளங்களையே அனுபவிக்கின்றனர். இதனால், அந்த நாடுகளில் அடிப்படைத் தேவைகளைக்கூட பூர்த்தி செய்ய முடியவில்லை என்றும் அந்த அமைப்பு சுட்டிக்காட்டியுள்ளது.உலக மக்கள்தொகையில் 4 சதவீதம் மட்டுமே உள்ள அமெரிக்கர்கள், 25 சதவீதம் கரியமில வாயுவை வெளியேற்றுகிறார்கள் என மற்றோர் ஆய்வு தெரிவிக்கிறது. இயற்கையை மனிதன் இப்படிச் சுரண்டுவதால் ஓசோன் படலம் சிதைவு, புவி வெப்பமடைதல், போதிய மழையின்மை, பனிக்கட்டி உருகுதல் போன்றவை நிகழ்கின்றன.பனிக்கட்டி உருகுவதால் கடல் நீர்மட்டம் 0.2 மீ. முதல் 1.5 மீ. வரை உயரக் கூடும் என ஓர் ஆய்வில் தெரியவந்துள்ளது. இதனால் மாலத்தீவு போன்ற நாடுகள் கடலில் மூழ்கக்கூடிய அபாயம் ஏற்பட்டுள்ளதாக அச்சம் ஏற்பட்டுள்ளது.இயற்கையைச் சுரண்டியதால் ஏற்பட்ட விளைவுகளை நமது தமிழகத்தில் ஊட்டி, குன்னூர் பகுதிகளில் அண்மையில் கண்டோம். மழை நீர்ப் பாதையை அடைத்தது, வனங்களை அழித்து கான்கிரீட் காடுகளாக மாற்றியது, மரங்களை வெட்டி தேயிலைத் தோட்டங்களாக்கியது, சட்டவிரோதமாக கல்குவாரிகளை நடத்துவது போன்றவற்றால் சமீபத்தில் பெய்த பேய் மழைக்கு நிலச்சரிவு, பூமி பிளவு போன்றவை ஏற்பட்டு 40-க்கும் மேற்பட்ட அப்பாவி மக்கள் பலியாகினர். ஆயிரக்கணக்கானோர் வீடு,வாசல்களை இழந்து தவித்து வருகின்றனர்.நமது நாட்டிலும் 33 சதவீதம் வனப் பகுதி இருக்க வேண்டிய இடத்தில் 20 சதவீதத்துக்கும் குறைவான வனப் பகுதியே உள்ளது.இப் பிரச்னைக்குத் தீர்வுதான் என்ன? "இயற்கை அன்னை நமது தேவைகளைப் பூர்த்தி செய்வாள். ஆனால், நமது பேராசைகளைப் பூர்த்தி செய்ய மாட்டாள்' என்றார் மகாத்மா காந்தி."போதுமென்ற மனமே பொன் செய்யும் மருந்து, அளவுக்கு மிஞ்சினால் அமிர்தமும் நஞ்சு' போன்றவற்றை நமது முன்னோர் சிறுவயதிலேயே மனங்களில் விதைத்தனர்.இயற்கையை வழிபடுவதை நமது முன்னோர்கள் நமக்குச் சொல்லிக் கொடுத்துள்ளனர். நிலம், நீர், ஆகாயம், காற்று, நெருப்பு ஆகிய பஞ்சபூதங்களை வழிபட வழிவழியாக நமது மூதாதையர்கள் கற்பித்து வந்துள்ளனர். தமிழ்நாட்டில் பஞ்சபூதத் தலங்கள் உள்ளதே இதற்கு சாட்சி.பூமியைத் தாயாகக் கருதி பூஜை செய்வது, இயற்கை உரங்களைப் பயன்படுத்தி விவசாயம் செய்வது போன்றவை அதன் ஓர் அங்கம்தான். ஆனால், குறுகிய காலத்தில் அதிகப் பணம்சம்பாதிக்க ரசாயன உரங்களையும், பூச்சிக் கொல்லிகளையும் பயன்படுத்தி உணவு அளித்த தாயையே மலடாக்க இன்று நாம் துணிந்துவிட்டோம்.கங்கா மாதா, காவிரித் தாய் என நதிகளைத் தாயாகக் கருதும் வழக்கம் நம் நாட்டில்தான் உண்டு. குளத்திலோ, ஆற்றிலோ எச்சில் துப்புவது, சிறுநீர் கழிப்பது, மலஜலம் கழிப்பது போன்றவை பாவம் என கற்பித்தனர். ஆனால், பாவங்களைப் போக்குவாள் என்று கருதப்படும் கங்கையைத் தூய்மைப்படுத்த பல்லாயிரம் கோடி ரூபாய் வேண்டும் என மத்திய அரசு இப்போது திட்டம் தீட்டி வருகிறது.மரங்களையும் தெய்வமாகக் கருதிய மக்களைக் கொண்ட நாடு இது. ஆனால், இன்று சகட்டுமேனிக்கு மரங்கள் வெட்டப்படுகின்றன. இந்த நிலை நீடித்தால், வாழ்வதற்கே தகுதியில்லாத பூமியைத்தான் நமது சந்ததிக்கு விட்டுச் செல்ல வேண்டியிருக்கும். நாம் இஷ்டப்படி வாழ்ந்துவிட்டு இயற்கைக்கு லஞ்சம் கொடுத்துத் தப்பிக்க முடியாது.இப் பிரச்னைகளுக்குத் தீர்வு காண அரசுகளிடையே பேச்சுவார்த்தைகள் தொடங்கியுள்ளன. ஆனால், அமெரிக்கா போன்ற வளர்ந்த நாடுகள் பொறுப்பை வளரும் நாடுகள் மேல் சுமத்தப் பார்க்கின்றன. அரசாங்கம் ஒருபக்கம் முயற்சிகளை மேற்கொண்டாலும், நாமும் நம் பங்குக்கு சில விஷயங்களைச் செய்ய முடியும்."அறத்தை நாம் காத்தால் அறம் நம்மைக் காக்கும்' என்ற சொற்றொடர் ஒன்று உண்டு. அதுபோல, "இயற்கையை நாம் காத்தால் இயற்கை நம்மைக் காக்கும்'.அமெரிக்க பாணி வாழ்க்கை முறையைப் பின்பற்றி நுகர்வோர் கலாசாரத்தில் மூழ்காமல், நமது தேவைகளைக் குறைத்துக் கொள்ளலாம்; நீர் நிலைகளைப் பாதுகாப்பதில் கவனம் செலுத்தலாம். பிளாஸ்டிக் பயன்பாடு சமூகத்துக்குப் பெரும் அச்சுறுத்தலாக உருவெடுத்துள்ளது. பிளாஸ்டிக்கைப் பயன்படுத்த மாட்டேன் என உறுதி ஏற்கலாம்.மின்சாரத்தைச் சிக்கனமாகப் பயன்படுத்தலாம். பெட்ரோல் பயன்பாட்டால் மாசு கடுமையாக அதிகரித்து வருகிறது. தவிர்க்கமுடியாத நேரம் தவிர மற்ற நேரங்களில் பொது வாகனப் போக்குவரத்தைப் பயன்படுத்தலாம். வாய்ப்புள்ள இடங்களில் மரங்களை நட்டுப் பராமரிக்கலாம்.இப்படி அனைவரும் செயல்படத் தொடங்கினால், சுற்றுச்சூழல் மாசுபடாத உலகை விட்டுச் சென்றோம் என நமது அடுத்த தலைமுறை நம்மை வாழ்த்தும்.

சனி, 24 அக்டோபர், 2009

உயிர் உள்ள ஒரு மரத்தின் பயன்

மரம் நமக்கு என்ன தருகிறது?

மலர்கள், காய், கனிகள் தருகிறது
நிழல், குளிர்ச்சி, மழை தருகிறது
காற்றை சுத்தப்படுத்துகிறது
நாம் வெளியிடும் கார்பன் டைஆக்சைடை கிரகித்துக் கொண்டு,நமக்குத் தேவையான ஆக்சிஜனை வெளியிடுகிறது.
கார்பன் டைஆக்சைடை கிரகித்துக் கொள்வதால் புவி வெப்பமடையும் விளைவை குறைக்கிறது.
மண்ணில் வேரோடி இருப்பதால், மண் அரிப்பைத் தடுக்கிறது. நிலச்சரிவுகளை தடுக்கிறது.
மரத்தைச் சுற்றி நீர் சேகரமாகவதால், நிலத்தடி நீர் அதிகரிக்கிறது.
காய்ந்த சருகு இலைகள் மண்ணுக்கு உரமாகின்றன.

ஒரு ஐம்பது ஆண்டு வளர்ந்த மரம் பல லட்சம் ரூபாய் சொத்துக்குச் சமமான நன்மைகளைத் தருகிறது.

ரூ. 5.30 லட்சம் மதிப்புள்ள ஆக்சிஜனை வெளியிடுகிறது.
ரூ. 6.40 லட்சம் மதிப்புள்ள மண் அரிப்பைத் தடுக்கிறது.
ரூ. 10.00 லட்சம் மதிப்புள்ள உணவைத் தருகிறது.
ரூ. 10.30 லட்சம் மதிப்புள்ள காற்று மாசுபாட்டைத் தடுக்கிறது.
ஒரு மரம் தன் வாழ்நாளில் கிரகித்துக் கொள்ளும் கார்பன் டைஆக்சைடின் அளவு 1000 கிலோ.

மரங்களை மனிதர்கள் பல்வேறு வகைகளில் பயன்படுத்தி வருகிறார்கள். அவற்றை அறிந்து கொள்ள நம்மைச் சுற்றிப் பார்த்தால் போதும். அந்த செயற்கை பயன்களின் பட்டியலை இந்த ஒரு பக்கத்துக்குள் அடக்க முடியாது ஒவ்வொரு மரமும் ஒரு வரம்

மரங்கள், காடுகள் நமக்குத் தரும் மேலும் சில நன்மைகள்:

மரங்கள் உணவைத் தருகின்றன. காய், கனி, கீரை வகைகள் போன்றவை மனிதனுக்கும், விலங்குகளுக்கும் கிடைக்கும் இயற்கைக் கொடை. மரங்கள் மட்டுமே உலகில் சுயமான உணவைத் தயாரிக்கும் திறனைப் பெற்றுள்ளன.

நச்சு வாயுவை உட்கொள்வதும், பிராண வாயுவை வெளிவிடுவதும் மரங்கள் செய்யும் அற்புதங்களில் ஒன்று. வேலை நேரம் தவிர நாம் பெரும்பாலான நேரம் வீட்டில்தான் கழிக்கிறோம். வீட்டிலும் வீட்டைச் சுற்றிலும் மரங்கள், செடிகொடிகளை வளர்த்தால் காற்று தூய்மையாகும்.

மரங்கள் இளைப்பாற நிழல் தருகின்றன. நகர்ப்புறங்களிலும், வசிப்பிடங்களிலும் வெப்பத்தை கட்டுப்படுத்தி இயற்கையான குளிர்சாதன வசதியைத் தருகின்றன.

மரங்கள் மழையைத் தருகின்றன. வானில் மழைமேகம் உருவாகும்போது மரங்கள் அதிகம் உள்ள பகுதியில் வீசும் குளிர்ந்த காற்றால் குளிர்விக்கப்படுகிறது. இதனால் அப்பகுதியில் மேகங்கள் மழையைப் பொழிகின்றன.

மரங்கள் மண்ணரிப்பைத் தடுக்கின்றன. வெட்ட வெளியில் மழை பெய்யும்போது மண் அரிக்கப்பட்டு ஆறு, குளம் போன்ற தாழ்ந்த பகுதிகளில் சேரும். இதனால் ஒருபுறம் வளமான மேல்மண் இழக்கப்படுவதும், மறுபுறம் ஆறுகள், குளங்கள் மேடாவதும் நடக்கிறது. மரம் உள்ள பகுதியில் மழை பெய்வதால், உடனடியாக மண் கரைந்து ஓடாமலும், வேர்கள் பிடித்திருப்பதால் அடிமண் அடித்துச் செல்லப்படாமலும் மண்ணரிப்பு தடுக்கப்படுகிறது.

கோடையில் அனல் காற்று வீசும்போது நிலம் வறண்டு போகிறது. காற்றில் மேல்மண் அடித்துச் செல்லப்படுகிறது. இதை மரங்கள் தடுத்து நிறுத்துகின்றன. இதன் மூலம் நிலம் பாலைவனமாகாமல் தடுக்கப்படுகிறது.

புயலின் வேகத்தை மரங்கள் கட்டுப்படுத்துகின்றன. கடலோரங்களில் காணப்படும் அலையாத்தி காடுகள் வேர்களில் மண்ணைச் சேகரித்து வைப்பதால் அலையின் வேகம் கட்டுப்படுத்தப்படுகிறது. இதனால்தான் அலையாத்தி காடுகள் என்ற பெயரும் வந்தது. பலமான வேர்களைக் கொண்டிருப்பதால் புயலின் வேகம் மட்டுப்படுத்தப்படுகிறது.

உயிரோடு இருக்கும்போது மட்டுமின்றி, இறந்த பின்பும் மரங்கள் நன்மையே தருகின்றன. ஏழை மக்களின் வீடுகளில் விறகாக-எரிபொருளாகப் பயன்படுகிறது.

மரமும், பலகைகளும் கதவு, ஜன்னல், வீடு கட்ட பயன்படுகின்றன. கட்டுமானப் பொருட்களில் இருந்து வீட்டுத் தேவைகள், அலங்காரப் பொருட்கள் வரை எண்ணற்ற பொருட்கள் மரங்களைக் கொண்டே தயாரிக்கப்படுகின்றன.

நன்றி

பூ உலகின் நண்பர்கள்

www.poovulagu.org